Нягледзячы на шматгадовы ўціск і гвалтоўную асыміляцыю беларускі народ 25 сакавіка 1918 году абвясьціў на ўвесь цывілізаваны сьвет пра сваю незалежнасьць, якая была потым прызнаная цэлым шэрагам эўрапэйскіх краінаў. Разам зь незалежнасьцю абвяшчаліся й дэмакратычныя свабоды для ўсіх грамадзянаў розных нацыянальнасьцяў, што жылі на той час у этнаграфічных межах Беларусі. Гістарычная нацыянальная сымболіка ўрэшце сталася дзяржаўнаю. Адразу ж распачалося ўтварэньне нацыянальнае сыстэмы адукацыі й культуры: зьявіліся беларускія школы і бібліятэкі, выдавецтвы і газэты, музэі і тэатры. Назовы Беларусь і Беларусы былі канчаткова замацаваныя на палітычнае і этнічнае мапе Эўропы.

Таварыства беларускае мовы імя Францішка Скарыны віншуе з гэтым найгалоўным сьвятам нашае дзяржавы як грамадзянаў Беларусі, гэтак і суайчыньнікаў замежжа, і жадае ўсім заўжды трымацца сваіх каранёў, ведаць і распаўсюджваць сваю мову, гісторыю й культуру! Жыве вольная і дэмакратычная Беларусь!